Babukanth V

ஓசூர் கிருஷ்ணகிரி மாவட்டம்.
ஓசூரில் அரசு விளையாட்டரங்கம் அருகில் திடக்கழிவு மேலாண்மை மையம் அமைக்கக்கூடாது. மக்களுக்கு விரோதமாக செயல்பட்டால் மாநகராட்சி எதிர்த்து பெரிய போராட்டம் நடத்தப்படும். அதிமுக முன்னாள் அமைச்சர் பாலகிருஷ்ண ரெட்டி எச்சரிக்கை.

கிருஷ்ணகிரி மாவட்டம் ஓசூர் அந்தி வாடி பகுதியில் கடந்த அதிமுக ஆட்சியின் பொழுது பல கோடி ரூபாய் மதிப்பில் உலகத்தரம் வாய்ந்த விளையாட்டு அரங்கத்தை தமிழக அரசின் சார்பில் அப்போதைய விளையாட்டுத்துறை அமைச்சராக இருந்த பி பாலகிருஷ்ண ரெட்டி முயற்சியால் அமைக்கப்பட்டது. பின்னர் இந்த விளையாட்டு அரங்கத்தில் தடகளம் மற்றும் கால்பந்து கைப்பந்து உள்ளிட்ட விளையாட்டுகளை நடத்துவதற்கு ஏதுவாக பல்வேறு மேம்பாட்டு நடவடிக்கைகளும் மேற்கொள்ளப்பட்டது.

இந்த நிலையில் தற்போதைய மாநகராட்சி நிர்வாகம் சார்பில் அந்த விளையாட்டு அரங்கத்திற்கு அருகாமையிலே குப்பைகளை தரம் பிரிக்கும் திடக்கழிவு மேலாண்மை மையத்தை அமைப்பதற்கான பணிகள் துவங்கி நடைபெற்று வருகிறது. இதற்கு விளையாட்டு வீரர்கள் அப்பகுதி குடியிருப்போர் மற்றும் சமூக ஆர்வலர்கள் என பல தரப்பினரும் கடும் எதிர்ப்பு தெரிவித்து வருகின்றனர். இது தொடர்பாக ஏற்கனவே விளையாட்டு வீரர்கள் மாநகராட்சி நிர்வாகத்தை எதிர்த்து ஆர்ப்பாட்டத்திலும் ஈடுபட்டனர் மேலும் இந்த திட்டத்தை அந்தப் பகுதியில் நிறைவேற்றுவதை கைவிட்டு மாற்று இடத்தில் அமைப்பதற்கான நடவடிக்கைகளை மேற்கொள்ள வேண்டும் எனவும் மாநகராட்சி நிர்வாகத்திடம் மனுக்கள் அளிக்கப்பட்டுள்ளன.

இந்த நிலையில் அரசு விளையாட்டு அரங்கத்தை நேரில் சென்று ஆய்வு செய்த முன்னாள் அதிமுக அமைச்சர் பாலகிருஷ்ண ரெட்டி பின்னர் செய்தியாளர்களிடம் பேசினார். அப்போது,

சுமார் 20 ஆண்டுகளுக்கும் மேலாக இந்தப் பகுதியில் அறக்கட்டளைக்கு சொந்தமான இந்த நிலத்தில் விளையாட்டு அரங்கம் அமைப்பதற்காகவே பிரத்தியேகமாக திட்டமிடப்பட்டு அவைகளும் கடந்த ஆட்சியில் சுமார் 3 கோடி ரூபாய் மதிப்பீட்டில் துவங்கப்பட்டது. பின்னர் உள்விளையாட்டு அரங்கம் மற்றும் பல்வேறு இதர விளையாட்டுகளுக்கு உண்டான அம்சங்கள் மேம்படுத்தப்பட்டு பராமரிக்கப்பட்டு வந்தன. மேலும் இங்கு நடை பயிற்சி மேற்கொள்வதற்கான வாக்கர்ஸ் பாத் , கூடைப்பந்து, நீச்சல் குளம் அமைத்தல் உள்ளிட்ட பல்வேறு விளையாட்டுகளை நடத்துவதற்கு ஏதுவாக மேம்படுத்தப்பட்டு இந்த பகுதி முழுவதுமாக விளையாட்டுக்கு மட்டுமே பயன்படுத்தப்படும் என்ற நிலைக்கு மாற்றி அமைக்கப்பட்டது.

அதேபோல கடந்த அதிமுக ஆட்சியில் ஓசூர் மாநகராட்சி பகுதியிலிருந்து அப்புறப்படுத்தப்படும் குப்பைகள் அள்ளப்பட்டு ஊருக்கு வெளிப்புறத்தில் சுமார் 100 டன்னுக்கு மேல் வெளியேற்றப்பட்டு வந்தது. ஆனால் தற்பொழுது ஆட்சி காலத்தில் ஓசூர் மாநகர் முழுவதுமே குப்பை கிடங்காகவே காட்சி அளிக்கிறது. மாநகராட்சி சார்பில் தற்பொழுது சொத்து வரி உள்ளிட்ட வரிகள் இரண்டு மடங்குக்கு மேல் உயர்த்தப்பட்டு வருவாயும் அதிகரிக்கப்பட்டுள்ள நிலையில் ஓசூர் மாநகராட்சியின் மேம்பாடும் பராமரிப்பும் மிகவும் தரம் தாழ்ந்து வருகிறது. இங்கு மாவட்ட தலைநகரை விட மக்கள் தொகை அதிகமாக உள்ள இந்த பகுதியில் தொழிற்சாலைகளும் ஏராளமாக உள்ளன.

இந்த நிலையில் இந்த விளையாட்டு அரங்கம் முழுவதுமாக விளையாட்டிற்கு என்றே ஒதுக்கப்பட்ட நிலையில் அருகாமையில் திடக்கழிவு மேலாண்மை மையத்தை அமைப்பதற்காக மாநகராட்சி நிர்வாகம் பணிகளை மேற்கொண்டு வருகிறது என்பதற்கு இந்த பகுதியில் பொதுமக்கள் சார்பில் கடுமையான எதிர்ப்பு நிலவி வருகிறது. எனவே மக்களுக்கான ஆட்சியில் மக்களுக்கு விரோதமான நடவடிக்கைகளை மேற்கொள்வது இந்த அரசு உடனடியாக கைவிட வேண்டும்.

ஏற்கனவே இதுபோன்ற திடக்கழிவு மேலாண்மை மையத்தை ஓசூர் காமராஜ் காலனி பகுதியில் அமைக்கப்பட்டு அங்கிருந்து வெளியேறிய நச்சுத்தன்மை கொண்ட விஷவாயு காரணமாக அருகில் உள்ள பள்ளி மாணவர்கள் அண்மையில் கடுமையாக பாதிக்கப்பட்டது அனைவரும் அறிந்ததே. இதுவரை அதற்கான காரணம் என்னவென்பது குறித்து உரிய விளக்கங்கள் அளிக்கப்படவில்லை.

இவ்வாறான சூழ்நிலைகளில் மீண்டும் இது போன்ற மக்களை பாதிக்கக்கூடிய மக்களுக்கு விரோதமான திடக்கழிவு மேலாண்மை மையம் அமைக்கும் பணியை மாநகராட்சி நிர்வாகம் உடனடியாக கைவிட்டு மாற்று இடத்தில் அமைக்க முன்வர வேண்டும். இல்லையென்றால் அதிமுக சார்பில் மாநகராட்சி நிர்வாகத்தை எதிர்த்து மிகப் பெரிய போராட்டத்தை நடத்த வேண்டி இருக்கும் என அவர் எச்சரித்துள்ளார்.

ஓசூர் தெற்கு பகுதி கழக செயலாளர் வாசுதேவன் , ஓசூர் மாநகராட்சி நான்காவது மண்டல குழு தலைவர் ஜெய் பிரகாஷ் ,வடக்கு பகுதி கழக செயலாளரும் ஓசூர் மாநகராட்சியின் நகரமைப்புக்குழு தலைவருமான அசோகா ,கிழக்கு பகுதி செயலாளர் ராஜா , ஒன்றிய கழக செயலாளர் ஹரிஷ் ரெட்டி,பேரவை மாவட்ட செயலாளர் சிட்டி ஜெகதீஷ், 38 வது வார்டு வட்ட கழக செயலாளர் கோபால ராமச்சந்திரன், மாமன்ற உறுப்பினர் குபேர சங்கர் , ரகுமான்,பாசறை மாவட்ட துணை செயலாளர் சுரேஷ், வட்டக் கழக செயலாளர் பிரகாஷ் ராமச்சந்திரன் , கிருஷ்ணன் சாக்கப்பா மற்றும் கழக நிர்வாகிகள் உடன் இருந்தனர்